الجمعة، 19 فبراير، 2016

احلام (3)

حلمت النهارده انى كنت واقف فى طابور مش واضح كان طابور ايه بس هو فى مصلحه حكومية و بعد كده لقيت نفسى عند  وائل العطار تقريبا و قاعد باكل قصاد المحل بتاعه فرخه هى ريحتها انها مشويه لكن هى كانت نيه .
وشوفت سبحه ياسين التهامى تقريبا اتخايلت بيها بس مركزتش 

الخميس، 18 فبراير، 2016

يوسف شاهين

لما كنت فى تالته اعدادى تقريبا كنت ديما بشوف افلام يوسف شاهين كلها بهتمام بالغ كل افلامه بلا استثناء معرفش كنت مشدود ليها ليه بالرغم انى مكنتش بفهم لا فى السنيما ولا فى اى حاجه تانيه لما طلعت اولى ثانوى كنت لسه محافظ على الاهتمام دا و كنت لما اروح عند حد من صحابى عنده نت كنت ممكن اقعد احمل فديوهات ليه بيتكلم فيها و كنت ديما بدور على تسجيل للقاء اللى اتعمل معاه فى البيت بيتك بس مكنتش بلاقيه . 
كان فى اسكندرية كمان و كمان بيتكلم عن رواية هاملت مكدبتش خبر رحت مكتبة المدرسة و دى كانت اول مرة اروح و استعرت هاملت عشان اقرأئها قرأتها و رجعتها وانا برجعها لقيت نسخة تانيه نضيفه رحت واخدها . 
فى الفترة دى اول ما جبت موبايل فيه كاميرا مش فاكر نوعه ايه بس مكنش حديث قوى صورت يوسف شاهين و حطيته خلفية على موبايلى كنت مصور رقصته مع عمرو عبدالجليل فى اسكندرية كمان و كمان بالموبايل برضو مكنتش عارف ايه اللى شاددنى ليه حتى بالرغم من انى دلوقتى يعتبر اتفرجت على سينما تعتبر احسن منه بكتير و فيها شغل اكتر منه بكتير وفيها مواضيع بس معرفش برضو ايه اللى كان مخلينى مشدود ليه ، بس هفضل بقدر الراجل دا لان بسببه يعتبر قرأت اول حاجه حقيقة فى حياتى هاملت .

أحلام (2)

مكان يشبه شؤن الطلبة بتاع كلية دار علوم عيال بتلعب كأنه حضانه ، انا بلعب مع بسنت الصغيرة وريتها بطاقتى لقيت على صورة مرسى قالتلى هبلغ عنك ، الواد حمص ماشى هو و العيال قلتلهم اقعدو العبوا ولا اتفرجوا على كرتون ، عيال خدت المفتاح و دخلت الحمام .
صوت ضرب وانا بجرى و لقفت مسدس من حد معرفوش و طلعت اجرى فى شارع انا عارفه ، بعد فترة لقيت نفسى فى زى دخلة الزريبة اللى عند عمى فى البلد وفى تفتيش كان فى اوضه جنبى رميت فيها المسدس و بقيت بعامل الظابط ببرود و قلعت الجزمة عشان يفتشها هو تقريبا مكنتش لاقى البطاقة بس لقيتها فى الاخر و اديتهاله ، مش فاكر حاجه تانى تقريبا 

الاثنين، 15 فبراير، 2016

احلام (1)

خدت قرار دلوقتى انى لما اصحى من النوم فاكر حلم حلمته هكتبه مش عارف ليه بس اكيد هحتاجه فى يوم من الايام حتى لو محتاجتوش  :

صحرا ، جامع تقريبا   ، ناس لابسه بدوى ، داخلين نتوضى ، شارع  او مكان مرسوم بشكل سريالى ميه قريبه منى جدا ميه زى بتاعت البحر الاوضه مليانه ميه مع انى ماشى على الرصيف ، من بعيد شايف راجل كبير و ضخم و اقرع والناس بتحاول تنيمه و تربطه وجنبه من بعيد واحد زيه تانى وانا ببص حسيت انى جو يونانى قديم .